Category Archives: ನಾಗನ ಪದಗಳು

“ಆಯಿತ್ವಾರ ಬಂತು”

ಬಂತು ಬಂತ್ ಆಯಿತ್ವಾರ ಬಂತು
ಆಯವಾಗಿರಬೈದು ಮನೆಯಾಗ ಕುಂತು

ಕೋಳಿ ಕೂಗಾಕಿಲ್ಲ — ಉರಿನ್ ಆಕಿ ವೊಲೆಗೆ –
ಶಾರೆ ತುಂಬಾ ಯೆಣ್ಣೆ ತಟ್ಟಿ ನನ ತಲೆಗೆ –
ರಪರಪಾ ರಾಚಿದರೆ ಬಿಸಿ ಕುದೀ ನೀರ –
ಬಂದು ಮತ್ ಮಲಗಿದರೆ — ವಂಬತ್ತು ಪೂರ!

ವಂಬತ್ತು — ಬಿಸಿ ಕಾಪಿ! ಅತ್ತಕ್ ಉಪ್ಪಿಟ್ಟು!
ಅನ್ನೆಳ ಡಕ್ ಎಸರು ಜೊತೆ ಬಿಸಿ ಮುದ್ದೆಯಿಟ್ಟು!
ಮತ್ತೆ ಮಕ್ಕಳ ಕೂಟೆ, ಅವರ್ ಆಟಪಾಟ!
ದಚಿಬಾರ ವುಲಿಕುರಿ ಮಲ್ಲಿ ಸಂಗಾಟ!

ಸಂಜಿಗ್ ಅಣ್ಣಂಮ್ಮಂಗೆ ತಟ್ಟೆ ತಂಬಿಟ್ಟು !
ಬಿಕ್ಸದೋರ್ಗ್ ಅದನಲ್ಲೆ ಅಂಚಿ ಯೀಟಿಟ್ಟು!
ರಾತ್ರಿ ಮನೆಯಾಗ್ ಇಡದು ಆರುಮನಿ, ಬಜನೆ!
ನಿದ್ದಿ ಅತ್ತೂಗಂಟ ಕತೆ ಯೇಳೊ ಮಜನೆ!

ಆಯಿತ! ಸುರಿಯಾ ! ನಮಗೆ ನೀ ತಂಪುದೀಪ –
ಕತ್ತಲೇನೇ ಯಿರಲಿ ಮಿಕ್ಕ ದಿನ ತಾಪ !
ಈವೊಂದೆ ದಿನನೆ — ನಾ ಬಿಟ್ಟದ್ದೆ ಬಾಣ !
ನಾಳೆಯಿಂದ ಎಂಗೂನೆ ಅದೇ ಅಳೇ ಗಾಣ!

(ಸಂಗ್ರಹ – ನಾಗನ ಪದಗಳು)

Advertisements